અંકલેશ્વર શહેર એ ડિવિઝન પોલીસે પ્રોહિબિશન એક્ટના ગુનામાં છેલ્લા કેટલાક સમયથી વોન્ટેડ એવા બે આરોપીઓને ઝડપી પાડ્યા છે. ગુપ્ત બાતમીના આધારે પોલીસે અંકલેશ્વર બસ સ્ટેન્ડ નજીકથી આ બંને આરોપીઓની ધરપકડ કરી હતી.
પોલીસ સૂત્રો પાસેથી મળતી માહિતી મુજબ, પોલીસ ઇન્સ્પેક્ટર પી.જી. ચાવડાના માર્ગદર્શન હેઠળ પોલીસ સ્ટાફ દ્વારા નિયમિત પેટ્રોલિંગ કરવામાં આવી રહ્યું હતું. તે દરમિયાન પોલીસને ચોક્કસ બાતમી મળી હતી કે પ્રોહિબિશનના ગુનામાં નાસતા ફરતા બે આરોપીઓ અંકલેશ્વર બસ સ્ટેશન તરફ આવી રહ્યા છે.
આ બાતમીના આધારે પોલીસે તુરંત જ બસ સ્ટેન્ડ નજીક વોચ ગોઠવી હતી. વોચ દરમિયાન, બાતમીમાં જણાવેલા વર્ણન મુજબના બે શખ્સો ત્યાં આવતા જ પોલીસે તેમને કોર્ડન કરીને પકડી પાડ્યા હતા.
પૂછપરછ કરતા તેઓ ભરૂચના દાંડિયા બજાર, સુથીયાપુરા વિસ્તારના રહેવાસી માનવ રાકેશ ચૌહાણ અને ધવલ ભરત જાદવ હોવાનું જાણવા મળ્યું હતું. આ બંને આરોપીઓ પ્રોહિબિશનના ગુનામાં ઘણા સમયથી વોન્ટેડ હતા. પોલીસે બંને આરોપીઓની ધરપકડ કરીને કાયદેસરની વધુ કાર્યવાહી હાથ ધરી છે.