ગુજરાત રાજ્યમાં હાઈ-એલર્ટ જાહેર કરવામાં આવ્યું છે. બનાસકાંઠા જિલ્લામાં પોલીસ તંત્ર સંપૂર્ણપણે એક્શન મોડ પર આવી ગયું છે, ખાસ કરીને ગુજરાત-રાજસ્થાન સરહદ પર સુરક્ષા વ્યવસ્થાને ચુસ્ત કરી દેવામાં આવી છે.દિલ્હીમાં તાજેતરમાં થયેલા કાર બ્લાસ્ટની ગંભીર ઘટના બાદ સમગ્ર ગુજરાત રાજ્યમાં હાઈ-એલર્ટ જાહેર કરવામાં આવ્યું છે. સંવેદનશીલ ભૌગોલિક સ્થિતિ ધરાવતા બનાસકાંઠા જિલ્લામાં પોલીસ તંત્ર સંપૂર્ણપણે એક્શન મોડ પર આવી ગયું છે, ખાસ કરીને ગુજરાત-રાજસ્થાન સરહદ પર સુરક્ષા વ્યવસ્થાને ચુસ્ત કરી દેવામાં આવી છે.
બનાસકાંઠા જિલ્લામાંથી પસાર થતી ગુજરાત-રાજસ્થાનને જોડતી તમામ મુખ્ય ચેકપોસ્ટ્સ પર સઘન ચેકિંગ શરૂ કરી દેવાયું છે. અમીરગઢ, ગુંદરી, ખોડા, વાતડાઉ અને માવસરી ચેકપોસ્ટ પર પોલીસનું કડક ચેકિંગ ચાલી રહ્યું છે. રાજસ્થાન તરફથી ગુજરાતમાં પ્રવેશતા તમામ વાહનોનું ઝીણવટભર્યું નિરીક્ષણ કરવામાં આવી રહ્યું છે, જેથી કોઈ શંકાસ્પદ તત્વ કે સામગ્રી રાજ્યમાં પ્રવેશી ન શકે.
વધુમાં, જિલ્લાના આંતરિક વિસ્તારોમાં પણ સુરક્ષા પગલાં લેવાયા છે. થરાદ જેવા સરહદી તાલુકાઓમાં આવેલી હોટલો અને રેસ્ટોરન્ટ્સમાં પણ પોલીસ દ્વારા ચેકિંગ હાથ ધરવામાં આવ્યું છે, જેથી છુપાયેલા કોઈ શંકાસ્પદ વ્યક્તિઓ કે ગેરકાયદે પ્રવૃત્તિઓ પર રોક લગાવી શકાય.
ઉત્તર ગુજરાતના સૌથી મોટા અને પ્રખ્યાત શક્તિપીઠ અંબાજી મંદિરની સુરક્ષા વ્યવસ્થામાં પણ તાત્કાલિક વધારો કરી દેવામાં આવ્યો છે. દિલ્હી બ્લાસ્ટ બાદ આ પાવન ધામની સુરક્ષાને વધુ મજબૂત બનાવવામાં આવી છે. 24 કલાક LMG (લાઇટ મશીન ગન) ગાર્ડ તૈનાત કરવામાં આવ્યા છે. મંદિરના પ્રવેશદ્વાર, શક્તિ દ્વાર ખાતે મેટલ ડિટેક્ટરની મદદથી ભક્તોનું સઘન ચેકિંગ કરવામાં આવી રહ્યું છે.
તાજેતરમાં રાત્રિના સમયે બોમ્બ ડિસ્પોઝલ સ્ક્વૉડ (BDDS) અને ડૉગ સ્ક્વૉડની ટીમો મંદિર પરિસરમાં પહોંચી હતી. તેમણે મંદિર સંકુલના દરેક ખૂણાને બારીકાઈથી ચેકિંગ કર્યું હતું. રાહતની વાત એ છે કે, સઘન તપાસ દરમિયાન મંદિર પરિસરમાંથી કોઈપણ શંકાસ્પદ વસ્તુ મળી આવી નહોતી. બનાસકાંઠા પોલીસની આ સક્રિયતા રાજ્યની સુરક્ષાને સુનિશ્ચિત કરવા માટેનું એક મહત્વપૂર્ણ પગલું છે.