ભરૂચથી અંકલેશ્વર તરફ જતા જૂના નેશનલ હાઈવે-8 પર કોન્ટ્રાક્ટર દ્વારા રાતોરાત ઊભા કરાયેલા ગેરકાયદેસર અને અવ્યવસ્થિત બમ્પરોને કારણે અનેક ગંભીર અકસ્માતો સર્જાયા છે. આ બમ્પરો પર કોઈ પણ પ્રકારના રિફ્લેક્ટર કે સૂચના બોર્ડ ન હોવાને કારણે વાહનચાલકોને તેની જાણકારી મળી નહોતી, જેના પરિણામે એક એમ્બ્યુલન્સ સહિત અનેક વાહનો હવામાં ઉછળ્યા હતા.
પ્રાપ્ત માહિતી અનુસાર, રસ્તા પર અચાનક આવેલા આ બમ્પરોથી અજાણ વાહનચાલકોના વાહનો નિયંત્રણ ગુમાવી બેઠા હતા. એક રિક્ષાચાલકને પણ આ બમ્પરની જાણ ન હોવાથી અકસ્માતનો ભોગ બનવું પડ્યું હતું, જેમાં પાંચ લોકોને નાની-મોટી ઈજાઓ પહોંચી હતી. ઈજાગ્રસ્તોને તાત્કાલિક સારવાર માટે હોસ્પિટલ ખસેડવામાં આવ્યા છે.
વાહનચાલકોએ આ ઘટના અંગે ઉગ્ર રોષ વ્યક્ત કર્યો છે અને જણાવ્યું છે કે રોડ સેફ્ટીના નિયમોનું સરેઆમ ઉલ્લંઘન થયું છે. કોન્ટ્રાક્ટરે બમ્પરો પર સફેદ રંગના કે રેડિયમ પટ્ટા લગાવવાની તસ્દી પણ લીધી નથી, જેના કારણે રાત્રિના સમયે વાહનચાલકો માટે આ બમ્પરો જોખમી સાબિત થઈ રહ્યા છે.
આ ઘટનાથી સ્થાનિક લોકોમાં ભારે આક્રોશ ફેલાયો છે અને તેઓ તંત્ર પાસે તાત્કાલિક પગલાં ભરવાની અને જવાબદાર કોન્ટ્રાક્ટર સામે કડક કાર્યવાહી કરવાની માંગ કરી રહ્યા છે. આ પ્રકારની બેદરકારી ભવિષ્યમાં વધુ ગંભીર અકસ્માતોનું કારણ બની શકે છે.