પંજાબી સિંગર અને એક્ટર દિલજીત દોસાંઝ હવે માત્ર ભારતનું જ નહીં પણ દુનિયાભરનું જાણીતું નામ બની ગયા છે. દિલજીતે વૈશ્વિક સ્તરે પોતાની ઓળખ બનાવી છે. તેમણે 2024માં પોતાના વર્લ્ડ મ્યુઝિક ટૂર ‘ઓરા વર્લ્ડ ટૂર’ દરમિયાન અમેરિકાના પ્રખ્યાત ટોક શો ‘ધ ટુનાઈટ શો સ્ટારિંગ જિમી ફોલન’માં ડેબ્યુ કર્યું હતું અને હવે તેઓ ફરીથી આ શોમાં પરત ફર્યા છે. દિલજીત દોસાંઝે સોશિયલ મીડિયા પર જિમી ફોલનના શોની કેટલીક ઝલક પણ શેર કરી છે, જેમાં તેઓ હોસ્ટને ભાંગડા શીખવતા અને પંજાબી ગીતો સાથે જમાવટ કરતા જોવા મળે છે. આ વીડિયોએ દિલજીત દોસાંઝના ફેન્સનો ઉત્સાહ વધારી દીધો છે.
સોશિયલ મીડિયા પર દિલજીત દોસાંઝે ધ ટુનાઈટ શો સ્ટારિંગ જિમી ફોલન શોના સેટની BTS ઝલક શેર કરી છે, જેમાં એક દ્રશ્યમાં તેઓ કહે છે- શું લાગતું હતું કે નહીં પાછા આવીએ? આ પછી દિલજીત હસે છે અને કહે છે – કહ્યું હતું ને કે એકવાર પંજાબી આવી જાય તો જલ્દી જતા નથી. અને આ વીડિયોના બેકગ્રાઉન્ડમાં દિલજીતનું જ સુપરહિટ ટ્રેક મોરની વાગી રહ્યું છે. ત્યારબાદ તેઓ શોના હોસ્ટ જિમી ફોલનને ભાંગડા શીખવે છે અને પોતાની રમૂજ તથા એનર્જીથી સૌને હસવા પર મજબૂર કરી દે છે.
દિલજીત દોસાંઝ પહેલા જિમી ફોલનને ભાંગડાના સ્ટેપ્સ શીખવે છે અને પછી બંને સાથે મળીને ભાંગડા કરે છે. જિમીએ દિલજીત સાથે વીડિયો શેર કરતા કેપ્શનમાં લખ્યું- દિલજીત પોતાનો ઓરા સાથે લાવ્યા છે. આ સાથે તેમણે સિંગરનો આભાર પણ માન્યો. હવે આ પોસ્ટ પર દિલજીત દોસાંઝના ફેન્સની સાથે સાથે સેલેબ્સના પણ જોરદાર રિએક્શન આવી રહ્યા છે. ધુરંધર 2 સિંગર જાસ્મિન સેન્ડલાસે પણ દિલજીતના આ વીડિયો પર પ્રતિભાવ આપ્યો છે. વિદેશની ધરતી પર દિલજીત જે રીતે ધૂમ મચાવી રહ્યા છે તેણે પંજાબી ઇન્ડસ્ટ્રીનું ગૌરવ વધાર્યું છે.
જિમી ફોલન અને દિલજીત દોસાંઝના ભાંગડાવાળા વીડિયો પર જાસ્મિન સેન્ડલાસ, નરગિસ ફાખરી, શમિતા શેટ્ટી, કરણ ઓજલા અને ગુરુ રંધાવાએ પણ પ્રતિક્રિયા આપી છે. જણાવી દઈએ કે, આ પહેલા દિલજીતે 2024માં પણ જિમી ફોલનના શોમાં હાજરી આપી હતી. તે દરમિયાન તેમણે G.O.A.T. અને બોર્ન ટુ શાઈન જેવા ગીતો પર પરફોર્મ કર્યું હતું. બે વર્ષ બાદ હવે ફરીથી જ્યારે તેમણે આ શોમાં વાપસી કરી છે ત્યારે સિંગરના ચાહકોની ખુશીનો પાર નથી.