કોરોનાની મહામારીના કારણે 11 માસથી બંધ કોર્ટની ફિઝીકલ કાર્યવાહી આજથી શરૂ થઇ છે. કોર્ટ શરૂ કરતા પહેલાં તમામ કોર્ટ રૂમને સેનેટાઇઝ કરવામાં આવી હતી. બરોડા બાર એસોસિએશન દ્વારા જરૂર જણાય તેવા જ જેલ કેદીને કોર્ટમાં હાજર રાખવા પોલીસ તંત્રને જણાવવામાં આવ્યું છે. ફિઝીકલ કોર્ટ શરૂ થતા 11 વર્ષથી સુમસામ ભાસતી કોર્ટો વકીલો અને અસીલોથી ધમધમી ઉઠી હતી.
વકીલોની હાલત દયનીય બની ગઇ હતી
છેલ્લા 11 માસથી કોર્ટો બંધ રહેવાના કારણે વકીલોની હાલત દયનીય બની ગઇ હતી. વકીલોને દિવસો પસાર કરવા મુશ્કેલ થઇ ગયા હતા. કેટલાક વકીલોએ અન્ય વ્યવસાયો શરૂ કરી દીધા હોવાના કિસ્સાઓ પણ બહાર આવ્યા હતા, પરંતુ, કોરોનાની વકરેલી સ્થિતીના કારણે કોર્ટ ફિઝીકલી શરૂ કરવામાં આવી ન હતી. બાર એસોસિએશન દ્વારા અનેક વખત કોર્ટ ફિઝીકલી શરૂ કરવા માટે રજૂઆત કરવામાં આવી હતી. ધરણાં-દેખાવો સહિતના કાર્યક્રમો પણ કરવામાં આવ્યા હતા. આખરે રાજ્યના તમામ બાર એસોસિએશન એક થઇ રજૂઆતો કરતા સરકાર દ્વારા ફિઝીકલ કોર્ટ શરૂ કરવા મંજૂરી આપવામાં આવી હતી.
આજથી કોર્ટ શરૂ થતાં વકીલોને રોજગારી મળી રહેશે
વડોદરા બાર એસોસિએશનના પ્રમુખ હસમુખ ભટ્ટે જણાવ્યું હતું કે, કોરોનાની મહામારીના કારણે 11 માસના લાંબા સમય બાદ કોર્ટ શરૂ થતાં વકીલોમાં ખુશી જોવા મળી રહી છે. ફિઝીકલી કોર્ટ બંધ રહેવાના કારણે વકીલોની હાલત કફોડી બની ગઇ હતી. હવે આજથી કોર્ટ શરૂ થતાં વકીલોને રોજગારી મળી રહેશે. તે સાથે જે અસીલોના કેસો અટવાઇ ગયા હતા. તે કેસોની કાર્યવાહી ચાલુ થશે. વકીલોની સાથે અસીલોમાં પણ ખુશી જોવા મળી રહી છે. છેલ્લા 11 માસથી સુમસામ ભાસી રહેલી કોર્ટો આજે વકીલો અને તેમના અસીલોની ચહલ-પહલથી ધમધમી ઉઠી હતી.