અમદાવાદ એરપોર્ટ પરથી ગોલ્ડ સ્મગલિંગનો વધુ એક ચોંકાવનારી ઘટના સામે આવી છે. દુબઈથી એર અરેબિયાની ફ્લાઇટમાં અમદાવાદ આવેલા ઉત્તર પ્રદેશના એક મુસાફરે પોતાના પેટમાં સોનાની કેપ્સૂલ છુપાવી લાવ્યાનું કબૂલ્યું છે. કસ્ટમ્સ વિભાગે અંદાજે 5 લાખ રૂપિયાથી વધુ કિંમતનું સોનું જપ્ત કરી કાયદેસરની કાર્યવાહી હાથ ધરી છે.
પ્રોફાઇલિંગ દરમિયાન શંકા, પૂછપરછમાં કબૂલાત
અમદાવાદ કસ્ટમ્સના એર ઈન્ટેલિજન્સ યુનિટ (AIU) અધિકારીઓએ પ્રોફાઇલિંગના આધારે ભારતીય પાસપોર્ટ ધારક ફખરુદ્દીન નામના મુસાફરને અટકાવ્યો હતો. પૂછપરછ દરમિયાન તેણે શરીરમાં ધાતુ જેવી નિષેધાત્મક વસ્તુ ગળી છુપાવી હોવાની કબૂલાત કરી હતી. 19મી ફેબ્રુઆરીના રોજ અમદાવાદના ચીફ જ્યુડિશિયલ મેજિસ્ટ્રેટના આદેશ મુજબ મુસાફરને અમદાવાદ સિવિલ હોસ્પિટલમાં દાખલ કરવામાં આવ્યો હતો. તબીબી દેખરેખ હેઠળ મળ પસાર કરતી વખતે ડૉક્ટરને પેકેટમાં છુપાવેલી ત્રણ સોનાની કેપ્સૂલ મળી આવી હતી.
સરકારી મૂલ્યાંકનકાર દ્વારા કરાયેલા મૂલ્યાંકન મુજબ ત્રણ આકાર વિનાના સોનાના બારનું કુલ વજન 37.18 ગ્રામ છે. તેની શુદ્ધતા 821.0 (19.71 કેરેટ) હોવાનું પ્રમાણિત કરવામાં આવ્યું છે, જેની બજાર કિંમત 5,01,827 રૂપિયા છે
.કસ્ટમ્સ એક્ટ હેઠળ જપ્તી અને તપાસ
કસ્ટમ્સ એક્ટ, 1962ની જોગવાઈઓ હેઠળ સોનું જપ્ત કરવામાં આવ્યું છે. મુસાફર સામે દાણચોરી કરવાનો પ્રયાસ કરવા બદલ કેસ નોંધાયો છે. સમગ્ર મામલે વધુ તપાસ ચાલુ હોવાનું કસ્ટમ્સ વિભાગે જણાવ્યું છે. નોંધનીય છે કે, અમદાવાદ એરપોર્ટ પર તાજેતરમાં ગોલ્ડ સ્મગલિંગના વધતા બનાવોને ધ્યાનમાં રાખીને સુરક્ષા એજન્સીઓ વધુ સચેત બની છે.