ઉત્તર પ્રદેશમાં કુંડાના બેંતી ખાતે ચાલી રહેલી શ્રીરામ કથા દરમિયાન બાબા બાગેશ્વર ધામના પીઠાધીશ્વર ધીરેન્દ્ર કૃષ્ણ શાસ્ત્રીએ સમાજવાદી પાર્ટીના પ્રમુખ અખિલેશ યાદવ પર જોરદાર પલટવાર કર્યો છે. કથા પર પ્રતિબંધ મૂકવાની માંગ, ધાર્મિક આયોજનો દ્વારા ચૂંટણી લાભ લેવાના આરોપ અને ભગવાન શ્રીકૃષ્ણ અંગે આપેલા નિવેદન પર તેમણે ખુલીને પોતાનો પક્ષ રજૂ કર્યો હતો. કથા રોકવાની માંગ સામે સવાલ ઉઠાવતા તેમણે કહ્યું કે, ‘જો કથા રોકવામાં આવશે તો શું નમાજ અને ચર્ચમાં થતી પ્રાર્થના પર પણ રોક લગાવવામાં આવશે?’
ધીરેન્દ્ર શાસ્ત્રીએ સ્પષ્ટ શબ્દોમાં જણાવ્યું કે, ‘બંધારણ મને પોતાના ધર્મનો પ્રચાર-પ્રસાર કરવાનો અધિકાર આપે છે.’ આ સાથે જ તેમણે મથુરામાં ભવ્ય કૃષ્ણ મંદિર બનાવવાને લઈને પણ મોટી જાહેરાત કરી હતી. કથા દ્વારા ચૂંટણી લાભ લેવાના આરોપ અંગે તેમણે કહ્યું કે, ‘અમે કથા ચૂંટણી માટે નહીં પરંતુ સનાતન ધર્મ માટે કરીએ છીએ અને અમારી કથા માત્ર ચૂંટણી સમયે જ નહીં પરંતુ આખા પાંચ વર્ષ ચાલતી રહે છે.’
ભગવાન શ્રીકૃષ્ણ પર આપેલા નિવેદન અંગે આપી સ્પષ્ટતા
ભગવાન શ્રીકૃષ્ણ પર આપવામાં આવેલા કથિત નિવેદન અંગે સ્પષ્ટતા કરતા ધીરેન્દ્ર કૃષ્ણ શાસ્ત્રીએ કહ્યું કે, ‘ત્રણ કલાકની કથાને ત્રણ મિનિટની રીલથી સમજી શકાય નહીં. મારી વાતને અડધી કાપીને પ્રસારિત કરવામાં આવી અને લોકોમાં ભ્રમ ફેલાવવામાં આવ્યો છે. સમગ્ર સંદર્ભ સાથે કથા સાંભળવાથી બધો જ ભ્રમ દૂર થઈ જશે, પરંતુ આ મામલાને રાજકીય રંગ આપવામાં આવ્યો છે. કથા કહેનાર કોઈ સંત ભગવાન શ્રીકૃષ્ણની નિંદા કેવી રીતે કરી શકે?’

મથુરામાં ભવ્ય કૃષ્ણ મંદિરને લઈને લીધો મોટો સંકલ્પ
રામ મંદિર બાદ હવે મથુરા અંગે પૂછાયેલા સવાલ પર તેમણે કહ્યું કે, ‘રામ અને શ્યામ એક જ છે તથા યદુવંશી અને રઘુવંશી તમામ સમાન છે. અમારામાં કોઈ જાતિવાદ કે ભેદભાવ નથી.’ તેમણે નારો આપતા કહ્યું કે, ‘કૃષ્ણ લલા હમ આયેંગે, માખન મિશ્રી ખાયેંગે.’
તેમણે જાહેરાત કરી કે 21 તારીખે તેઓ બાંકે બિહારીના દર્શન કરશે અને ત્યાંથી જ એક સંકલ્પ લેશે કે ઔરંગઝેબના કલંકની નિશાની મટી જાય અને આપણા કૃષ્ણ કનૈયા ત્યાં ભવ્ય અને દિવ્ય સ્વરૂપમાં બિરાજમાન થાય. આ માટે આગામી સમયમાં સમુચિત હનુમાન ચાલીસાના પાઠ પણ કરવામાં આવશે.

