આમ આદમી પાર્ટી (AAP) છોડીને BJPમાં જોડાયા પછી રાજ્યસભા સાંસદ રાઘવ ચઢ્ઢાએ પહેલો વીડિયો જાહેર કર્યો. રાઘવ ચઢ્ઢાએ કહ્યું કે AAPમાં ટોક્સિક વર્ક એન્વાયર્નમેન્ટ (toxic work environment) થઈ ગયું હતું. કામ કરવા-બોલવાથી રોકવામાં આવી રહ્યા હતા. આ પાર્ટી હવે અમુક ભ્રષ્ટ અને સમાધાનકારી લોકોના હાથમાં ફસાઈને રહી ગઈ છે. આ લોકો પોતાના ફાયદા માટે કામ કરે છે.
રાઘવે કહ્યું કે હું ખોટો હોઈ શકું છું પરંતુ કુલ 7 સાંસદોએ પાર્ટી છોડી તો શું બધા ખોટા થઈ ગયા? આ પહેલા પણ જે લોકોએ પાર્ટી છોડી, શું તેઓ પણ ખોટા થઈ ગયા? હું પાર્ટીનો સ્થાપક સભ્ય રહ્યો છું. જે હેતુથી આ પાર્ટી બની હતી, હવે તે પાર્ટી રહી નથી. મારી પાસે 3 વિકલ્પો હતા, મેં પાર્ટી છોડવી જ યોગ્ય સમજી.
આ દરમિયાન રાજ્યસભાએ AAPના 7 સાંસદો અને BJPના વિલીનીકરણને મંજૂરી આપી દીધી છે. હવે રાઘવ ચઢ્ઢા, અશોક મિત્તલ, વિક્રમજીત સાહની, હરભજન સિંહ ભજ્જી, ડો. સંદીપ પાઠક, સ્વાતિ માલીવાલ અને રાજિંદર ગુપ્તા સત્તાવાર રીતે BJPના સાંસદ બની ગયા છે. હવે રાજ્યસભામાં ભાજપના 113 સાંસદ થઈ ગયા છે.
રાઘવ ચઢ્ઢાની 6 મહત્વની વાતો
- લોકો BJPમાં જવા પાછળનું કારણ જાણવા માગી રહ્યા છે: BJPમાં જોડાયા પછી મિત્રો, તમારા ઘણા મેસેજ આવી રહ્યા છે. કેટલાક લોકો મને શુભેચ્છાઓ આપી રહ્યા છે, જ્યારે કેટલાક લોકો મારા આ નિર્ણય પાછળનું કારણ જાણવાનો પ્રયાસ કરી રહ્યા છે. તેથી આ વીડિયો બનાવ્યો છે. આ તે લોકો માટે પણ છે, જેમણે મારી પ્રેસ કોન્ફરન્સ જોઈ નથી, તેમને પણ આનાથી જવાબ મળી જશે.
- AAPને 15 વર્ષ આપ્યા, પરંતુ આ તે પાર્ટી નથી: રાજકારણમાં આવતા પહેલા હું પ્રેક્ટિસિંગ ચાર્ટર્ડ એકાઉન્ટન્ટ હતો. મારી સામે એક શાનદાર કારકિર્દી હતી, પરંતુ હું તે કારકિર્દી છોડીને રાજકારણમાં આવ્યો. મારી કારકિર્દી બનાવવા માટે અહીં આવ્યો નથી. એક રાજકીય પક્ષનો સ્થાપક સભ્ય બન્યો. તે પક્ષને મારા યુવાનીના 15 વર્ષ આપ્યા. મારા લોહી-પરસેવાથી આ પક્ષને સિંચ્યો, પરંતુ આજે આ પાર્ટી તે જૂની પાર્ટી રહી નથી.
- ટોક્સિક વર્ક એન્વાયર્નમેન્ટ થઈ ગયું હતું: આ પાર્ટીમાં આજે ટોક્સિક (ઝેરીલું) વર્ક એન્વાયર્નમેન્ટ છે. તમને કામ કરતા રોકવામાં આવે છે, સંસદમાં બોલતા રોકવામાં આવે છે. આ રાજકીય પાર્ટી થોડા ભ્રષ્ટ અને સમાધાનકારી લોકોના હાથમાં ફસાઈ ગઈ છે, જે હવે દેશ માટે નહીં, પોતાના અંગત ફાયદા માટે કામ કરે છે. છેલ્લા કેટલાક વર્ષોથી હું આ અનુભવી રહ્યો હતો. કદાચ હું સાચો માણસ ખોટી પાર્ટીમાં હતો. આના કારણે મારી સામે ત્રણ વિકલ્પો હતા.
- 7 માણસો ખોટા ન હોઈ શકે: પહેલો વિકલ્પ એ હતો કે હું રાજકારણ છોડી દઉં. બીજો, હું આ જ પાર્ટીમાં રહું અને બાબતોને સુધારવાનો પ્રયાસ કરું, જે બન્યું નહીં. ત્રીજો, હું મારી એનર્જી અને અનુભવ લઈને પોઝિટિવ રાજકારણ કરું. અન્ય રાજકીય પાર્ટી સાથે જોડાઈને સકારાત્મક રાજકારણ કરું. તેથી હું એકલો નથી. મારી સાથે એક નહીં, બે નહીં, પરંતુ ચાર નહીં, પરંતુ 7 સાંસદોએ આ નિર્ણય લીધો છે કે અમે આ રાજકીય પાર્ટી સાથે સંબંધ તોડીએ છીએ. એક માણસ ખોટો હોઈ શકે છે, બે માણસો ખોટા હોઈ શકે છે, પરંતુ સાત માણસો ખોટા ન હોઈ શકે.
- ઓફિસનું વાતાવરણ ઝેરી હોય તો કેટલું કામ કરી શકશો: તે અસંખ્ય લોકો અને જે શિક્ષિત લોકો આ પાર્ટી સાથે જોડાયેલા હતા, પરંતુ પાર્ટી છોડીને ચાલ્યા ગયા. શું તે બધા ખોટા હોઈ શકે છે? તમે એમ સમજો, જેટલા ઓફિસ જતા લોકો છે, જો તમારું કાર્યસ્થળ ઝેરી બની જાય તો તમે કેટલું કામ કરી શકશો? તમને કામ કરતા રોકવામાં આવે, તમારી મહેનતને દબાવવામાં આવે, તમને ચૂપ કરાવવામાં આવે, તો શું કરશો? તે સ્થિતિમાં સાચો નિર્ણય એ જ છે કે તમે તે કાર્યસ્થળ છોડી દો. કદાચ અમે પણ તે જ કર્યું.
- પૂરા જોશથી લોકોના મુદ્દા ઉઠાવતો રહીશ: રાઘવે કહ્યું- તમારામાંથી કેટલાક લોકોએ એ પણ પૂછ્યું કે શું હું પહેલાની જેમ તમારા મુદ્દા ઉઠાવતો રહીશ કે બંધ કરી દઈશ. હું વિશ્વાસ અપાવું છું કે તમારી સમસ્યાઓને એનર્જી અને જોશ સાથે ઉઠાવીશ. હવે તે સમસ્યાઓના ઉકેલ પણ શોધી શકીશું.
AAP સરકારે હટાવી તો કેન્દ્રએ 3 સાંસદોને સિક્યોરિટી આપી
આમ આદમી પાર્ટી (AAP)ના 7 સાંસદોમાંથી પાર્ટી છોડનારા ત્રીજા સાંસદ અશોક મિત્તલને કેન્દ્ર સરકારે Y સિક્યોરિટી આપી છે. આ પહેલા 26 એપ્રિલે પંજાબની AAP સરકારે પૂર્વ ક્રિકેટર અને પાર્ટી છોડનારા રાજ્યસભા સાંસદ હરભજન સિંહની Y કેટેગરી સિક્યોરિટી હટાવી લીધી હતી.
તેમના જલંધર ખાતેના ઘર પર તહેનાત પંજાબ પોલીસના જવાનોને તરત જ પાછા બોલાવી લેવામાં આવ્યા. તેના તરત જ બાદ કેન્દ્ર સરકારે હરભજનને CRPFની સુરક્ષા આપી દીધી. તેમના ઘરની બહાર આ જવાનો તહેનાત કરી દેવામાં આવ્યા છે.
જોકે, ભજ્જીએ હજુ AAP છોડવા કે BJP જોઈન કરવા અંગે કંઈ કહ્યું નથી, પરંતુ રાઘવ ચઢ્ઢાએ તેમના પણ સાથે હોવાનો દાવો કર્યો હતો. હરભજન પહેલા AAP સરકારે રાઘવ ચઢ્ઢાની પણ Z+ સુરક્ષા પાછી ખેંચી લીધી હતી. તેના પછી તેમને કેન્દ્ર તરફથી આ જ સુરક્ષા મળી ગઈ.
જાણો, 7 સાંસદોના AAP છોડવાના મામલે અત્યાર સુધી શું થયું..
રાઘવ ચઢ્ઢાએ 24 એપ્રિલે દિલ્હીમાં પ્રેસ કોન્ફરન્સ કરીને AAP છોડવાની જાહેરાત કરી. તેમણે કહ્યું કે AAPના 10માંથી 7 સાંસદો પાર્ટી છોડી રહ્યા છે. એ જ દિવસે સાંજે રાઘવ ચઢ્ઢા, સંદીપ પાઠક અને અશોક મિત્તલ ભાજપમાં જોડાઈ ગયા. તેના બીજા દિવસે પંજાબના CM ભગવંત માને 7 AAP સાંસદોના પાર્ટી છોડવા અંગે રાષ્ટ્રપતિ દ્રૌપદી મુર્મુ સાથે મુલાકાતનો સમય માંગ્યો.સીએમ ભગવંત માન રાષ્ટ્રપતિ સમક્ષ ધારાસભ્યો સાથે જઈને રાઈટ ટુ રિકોલની માંગ કરવાના છે. જોકે, હજુ સમય મળ્યો નથી. આ પછી AAP સાંસદ સંજય સિંહે કહ્યું કે રાજ્યસભાના અધ્યક્ષને પત્ર લખીને તેમનું સભ્યપદ રદ કરવાની માંગ કરશે કારણ કે માત્ર 3 સાંસદોએ ભાજપ જોઈન કરી. આ દરમિયાન છેલ્લા 3 દિવસથી પંજાબમાં AAPના સાંસદોના ઘરો પર પ્રદર્શન કરીને તેમને ગદ્દાર લખવામાં આવ્યું.