અમેરિકાના પ્રમુખ ડોનાલ્ડ ટ્રમ્પે રવિવારે જાહેરાત કરી છે કે તેહરાન અને મધ્ય પૂર્વના દેશો તરફથી હુમલા રોકવાની અપીલ બાદ, અમેરિકા ઈરાન સામે આયોજિત સૈન્ય કાર્યવાહી સ્થગિત કરવા માટે સહમત થઈ ગયું છે. અમેરિકી પ્રમુખે દાવો કર્યો હતો કે એક સંભવિત કરારનું માળખું (ફ્રેમવર્ક) તૈયાર થઈ ગયું છે. તેમના સોશિયલ મીડિયા પ્લેટફોર્મ ‘ટ્રુથ સોશિયલ’ પર એક પોસ્ટમાં પ્રમુખ ટ્રમ્પે જણાવ્યું કે, અમેરિકા સૈન્ય કાર્યવાહી માટે સંપૂર્ણપણે સજ્જ છે, પરંતુ રાજદ્વારી પ્રક્રિયાને તક આપવા માટે આયોજિત સ્ટ્રાઈક રોકવાનો નિર્ણય લેવામાં આવ્યો છે.
પ્રસ્તાવિત કરારની મુખ્ય શરતો
પ્રમુખ ટ્રમ્પના જણાવ્યા અનુસાર, પ્રસ્તાવિત કરારમાં બે મુખ્ય બાબતોનો સમાવેશ થાય છે:
- હોર્મુઝની ખાડી (Strait of Hormuz) ને તરત જ અને સંપૂર્ણપણે ફરીથી ખુલ્લી કરવી.
- ઈરાનના પરમાણુ ખતરાને કાયમી ધોરણે નાબૂદ કરવો.
પ્રમુખ ટ્રમ્પે વધુમાં ઉમેર્યું કે, “વિશ્વના ભવિષ્ય માટે અને એક શાંતિપૂર્ણ તથા ખુશહાલ ઈરાન જળવાઈ રહે તે હેતુથી, હું હુમલા રોકવા માટે સહમત થયો છું, શરત એ છે કે આપણે ઝડપથી કોઈ નક્કર કરાર પર પહોંચીએ.” તેમણે ઉમેર્યું કે ઇઝરાયલ પણ આ ડિપ્લોમેટિક રસ્તો અપનાવવાના નિર્ણયમાં સાથે છે.
પરમાણુ હથિયાર અંગે અમેરિકાનું વલણ સ્પષ્ટ
કેમ્પ ડેવિડ ખાતે યોજાયેલી લાઈવ કેબિનેટ બેઠક બાદ પત્રકારો સાથે વાતચીતમાં પ્રમુખ ટ્રમ્પે સ્પષ્ટ કર્યું હતું કે, રાજદ્વારી વાટાઘાટો ચાલુ હોવા છતાં અમેરિકા ઈરાન પર દબાણ જાળવી રાખશે. તેમણે ભારપૂર્વક જણાવ્યું કે અમેરિકાનો મુખ્ય હેતુ ઈરાનને પરમાણુ હથિયાર મેળવતા રોકવાનો છે. ઈરાન પાસે પરમાણુ હથિયાર હોઈ શકે નહીં, કારણ કે જો તેમની પાસે પરમાણુ શસ્ત્રો હોત તો મધ્ય પૂર્વમાં અત્યાર સુધી ભારે તબાહી સર્જાઈ ચૂકી હોત.