પાકિસ્તાનના પૂર્વ વડાપ્રધાન બેનજીર ભુટ્ટોની દીકરી આસિફા રાજકારણમાં આવી ગઈ છે. આસિફાએ સોમવારે મુલ્તાનમાં પાકિસ્તાન ડેમોક્રેટેક મૂવમેન્ટ (PDM)ની રેલીમાં ભાષણ આપ્યું છે. આસિફાએ કહ્યું, હવે સમય આવી ગયો છે, જ્યારે મુલ્કની સત્તા પર કબજો કરનાર સરકારને ઘરે મોકલવામાં આવે. અમે બધા ઈમરાન સરકારને ઈલેક્ટેડ નહીં, પરંતુ સિલેક્ટેડ પ્રાઈમ મિનિસ્ટર માનીએ છીએ.
આસિફાના ભાઈ બિલાવલ ભુટ્ટો ઝરદારી પાકિસ્તાન પીપલ્સ પાર્ટી (પીપીપી)ના ચેરમેન છે. તેને ગયા સપ્તાહમાં કોરોના પોઝિટિવ આવ્યો હતો. માનવામાં આવે છે કે ભાઈની મદદ માટે આસિફા પહેલીવાર કોઈ રાજકીય રેલીમાં એક્ટિવ જોવા મળ્યાં છે.
ગેરસમજમાં ઈમરાન
રેલીમાં આસિફાએ કહ્યું છે- ઈસ્લામાબાદમાં બેઠેલી સરકારને એવી ગેરસમજ છે કે તેઓ વિપક્ષને દબાવી દેશે. અમે દરેક અન્યાય સામે અવાજ ઉઠાવીશું. ઈમરાનને એક જ મેસેજ છે- તમારો સમય હવે પૂરો થઈ ગયો છે. હવે બિસ્તરાં-પોટલાં બાંધીને રવાના થઈ જાઓ, મારી માતાએ આ દેશ માટે કુરબાની આપી છે. પિતા આજે પણ સંઘર્ષ કરી રહ્યા છે.
આસિફાએ ઈમરાનને ચેતવણી આપતાં કહ્યું હતું કે તેમને એમ લાગતું હશે કે અમે લોકો ધરપકડ અને અન્યાયથી ડરી જઈશું. જો તેઓ અમારા ભાઈઓની ધરપકડ કરશે તો અમે બહેનો સરકાર સાથે સંઘર્ષ કરીશું.
પરિવારમાં સૌથી નાની છે આસિફા
આસિફા અલી ઝરદારી અને બેનજીરનાં ત્રણ બાળક છે. 27 વર્ષની આસિફા સૌથી નાની છે. તેનું એજ્યુકેશન બ્રિટનમાં થયું છે. આસિફાની મોટી બહેન બખ્તાવરના તાજેતરમાં જ લંડનના એક બિઝનેસમેન સાથે લગ્ન થયા છે. ભાઈ બિલાવલ પીપીપીના ચેરમેન છે. પિતા રાષ્ટ્રપતિ રહી ચૂક્યા છે. મા બેનજીરનું 27 ડિસેમ્બર 2007માં એક આતંકી હુમલામાં મોત થયું હતું.
